ఓ తండ్రి....

ఇంటి పెద్ద కొడుకు ఓ ఇల్లు కొనుక్కోడానికి కొంత సొమ్ము తగ్గింది మీరు సర్దండి అన్న దానికి నీకు మీ బేంకులో లోన్ వస్తే తీసుకో లేకపోతే బయటెక్కడన్నా అప్పు పుడితే తెచ్చుకో,ఒకవేళ అది నువ్వు ఏదన్నా విపత్కర పరిస్థితిలో తీర్చలేకపోయిన పక్షంలో నేను తీరుస్తాను.అంతే కానీ నా దగ్గరున్న సొమ్ము అప్పుగా ఇవ్వను అని తన పెద్ద కొడుకుతో తెగేసి చెప్పగల దమ్మున్న తండ్రి మీకు తెలుసా?
చిన్న కొడుక్కి ఉద్యోగప్రయత్నాల్లో ఒక ప్రభుత్వ ఉద్యోగానికి లంచం ఇవ్వాల్సి వస్తే, లంచం ఇచ్చేపనే లేదు, నిన్ను నమ్మను, నిన్ను నమ్మి నేను కష్టపడి సంపాదించిన సొమ్ము నీ మీద పెట్టుబడి పెడితే రేప్పొద్దున్న మమ్మల్ని చూస్తావన్న గ్యారంటీ నాకు లేదు అని చిన్నకొడుకుని అనగలిగిన తండ్రి మీరెప్పుడయినా చూశారా?
మావగారంటే పిల్లనిచ్చాడు కాబట్టి అల్లుడి దగ్గర చెప్పండి బాబయ్యా ఏంకావాలంటే అది తలతాకట్టు పెట్టి తెచ్చిస్తా అని చేతులు నులుపుకుంటూనో,ఏదో నేరం చేసిన వాడిలా తలదించుకునో కాకుండా నేను పితృపంచకాల్లో ఒకడ్ని నాకు ఇవ్వాల్సిన మర్యాద నువ్వివ్వాల్సిందే, అల్లుడిగా నీకు నేనేమి చెయ్యాలో అది తప్పకుండా చేస్తాను అని పాత రోజుల్లోనే చెప్పగలిగిన మావగార్ని మీరెరుగుదురా?
పోయిన గోదావరి పుష్కరాల్లో మొదటిరోజే తన బావమరిది కాలంచేస్తే ఊరుఊరంతా పుష్కరాలకి వెళ్ళిపోతే, అంతిమయాత్రకు మోసుకెళ్ళే నలుగురు మనుషులు దొరక్కపోతే తన ఇద్దరు కొడుకులచేతా(తల్లితండ్రులు బ్రతికుండగా అలాంటి కార్యక్రమాల్లో పాలుపంచుకోకూడదంటారు) ఇంకో ఇద్దరు మిత్రుల చేతా దగ్గరుండి మోయించి మరీ బావమరిది రుణం తీర్చుకున్న మనిషి మీకెక్కడయినా ఎదురయ్యాడా?
నీకు ఐదు పైసలివ్వాలా ఇదిగో తీసుకో,నాకు నువ్వు ఐదు పైసలివ్వాలా అయితే వెంటనే ఇచ్చేసెయ్యి అని మీరు నిద్రలో ఉన్నప్పుడయినా సరే లేపి ఇచ్చేసో లేక తీసుకున్నవ్యక్తి మీకెక్కడయినా తారసపడ్డాడా?
మా బాధ్యతగా మీకు చెయ్యగలిగింది చేసాను,ఇప్పుడు మీ బాధ్యతగా మీరు మాకు కావాల్సిన రీతిలో మేమిష్టపడ్డ విధంగా మేము బ్రతికున్నంత కాలం చూసుకోవాలి, ఏ పనీ పాటాలేకుండా మీదగ్గర పడి తింటున్నామని చిన్న చూపు చూడ్డానికి వీల్లేదు సుమా అని అని ఒక ఇంటిపెద్ద తన పిల్లలతో అని చచ్చేంతవరకూ అలాగే జరిపించుకున్న వైనం ఎక్కడయినా చూసారా?
సలహా అనేది ఆముదం లాంటిది. ఇచ్చేవాడికి సులభంగానూ పుచ్చుకునేవాడికి కష్టం గానూ ఉంటుందని నానుడి.అదికూడా తనవారా పెరవారా అనే బేధంలేకుండా ఇవ్వడం అనేది ఒక కళ.చక్కటి లౌక్యం తెలిసున్న వారికి మాత్రమే అది సాధ్యమని నాకనిపిస్తుంది.ఎక్కడ ఎవరికి ఏవిధమయిన సలహా ఎంత ఔన్సులో ఇవ్వాలో అంతపద్ధతిగానూ ఇవ్వగలిగిన వ్యక్తిని నేను అతిదగ్గరగా చూసాను. అది నాకు జీవితంలో చాలా నేర్పింది కూడా.
మన అవసరానికి సొమ్మివ్వకుండా సాయం చెయ్యకుండా ఓ చెత్తవెధవల్లా చూసిన పెద్దమనిషే కొన్నేళ్ళయ్యాక మేమేదోసాధించేసామని ఫోజులుకొడితే ఒరే వెర్రివెధవల్లారా నేనానాడు మీకు సాయం చేసి మిమ్మల్ని గట్టేక్కించేస్తే మీకు కష్టం విలువ తెలిసేది కాదురా కుంకల్లారా ఇలా మీకాళ్ళమీద మీరు నిలదొక్కుకోలేక పొయ్యేవారు కాదు, నేనున్నానని ధైర్యంగా గట్టుమీదున్న మిమ్మల్ని నీళ్ళలోకి తోసిందీ నేనే,చస్తామేమో అని ప్రాణభయంతో మీ అంతట మీరే ఈతనేర్చుకోడానికి అదే సాయపడింది అంతే నేను చేసింది, “ఆత్మావై పుత్రనామాశి” నా అంశమీద నాకెందుకు అపనమ్మకముంటుందని ఓ వేదాంతిలా చెప్తుంటే అటువంటి పెద్దమనిషిని చూసినప్పుడు మీకేమనిపిస్తుంది? నిజం చెప్పద్దూ గీతలో కిట్టపరమాత్మే గుర్తొచ్చాడు నాకయితే.
ఈ సోదంతా ఎందుకు ఎవరిగురించి అంటారా నాకు బాగా తెల్సిన ఓ పెద్దాయన గురించి,నాకు జన్మనిచ్చి బ్రహ్మోపదేశం చేసిన నా పిత్రుపాదుల గురించి,పిల్లలు ఎదిగొచ్చేసారు అని తను బాధ్యతగా చెయ్యాల్సిన మనవల ఒడుగు ముచ్చట్లు కూడా చెయ్యాల్సిన వయసులోనే చేయించేసి,
"దంతంబుల్పడనప్పుడే, తనువునందారూఢియున్నప్పుడే,
కాంతాసంఘము రోయనప్పుడే జరాక్రాంతంబుగానప్పుడే,
వింతల్మేనుజరింపనప్పుడే,కురుల్వెల్వెల్ల గానప్పుడే,
చింతింపన్వలె నీ పదాంభుజములన్ శ్రీకాళహస్తీశ్వరా"
అని ధూర్ఝటి మహాశయులు సెలవిచ్చినట్టుగా, రామ”కోటి” రాసి చక్కగా ఆ శ్రీరామునికి తన స్వహస్తాలతోటే అంకితం ఇచ్చుకుని,దేవుడే ప్రత్యక్షమయి ఏమి కావాలో కోరుకొమ్మంటే "అనాయాస మరణం" ఎలా కోరుకుంటామో అలా ముందురోజు రాత్రి తనకిష్టమయిన జేసుదాస్ సంగీతవిభావరి కార్యక్రమం చూసి ఆనందించి,చక్కగా సైకిలుమీద ఇంటికొచ్చి వేడివేడిగా దిబ్బరొట్టి ఎర్రగా కాల్పించుకుని సుష్టుగా తిని,సుఖమయిన నిద్రపోయి, ఆ తర్వాతి రోజు సాయంత్రం గోదావరికెక్కి గోదారిదగ్గర (రాజమండ్రి) దిగాల్సిన పెద్దాయన ఆ మధ్యాహ్నమే చక్కటి కునుకుతీస్తూ అలాగే నిద్రలో "ఆ" అన్న శబ్దం పక్కగదిలో ఉన్నజనాల చెవులకి సోకేలోగానే గాఢసుషుప్తిలోకి జారుకుంటే అదృష్టం కాకపోతే ఇంకేంటి చెప్పండి 84యేళ్ళ వయసులో.
ఆ రోజు ప్రయాణానికని రెడీ చేసి వంకీకి తగిలించిన పొందూరు ఖద్దరు లాల్చీలోంచి ఆరోజు వెళ్ళాల్సిన ట్రెయిన్ టిక్కట్టు చిరునవ్వుతో చూస్తోంది ఇంక నీకు నాతో పనిలేదన్నట్టుగా. నా అవసరం లేకుండానే నీప్రయాణం సాగిపోతోంది అన్నట్టుగా...

రౌడీ తన బ్లాగులో వేసిన పోస్టు చూసి తల్చుకుంటే పనులెందుకు అవవనిపించి భీష్మఏకాదశికి పోస్ట్ చేద్దామని అనుకున్నది వాయిదా పడుతూ ఇప్పటికి అయింది. దానికీ దీనికీ లింకేంటి అంటే మా పెద్దాయన పుట్టిన రోజు అదేరోజు అందుకని.అదీ విషయం.
అసందర్భమనిపించినా ఎందుకో రాయాలనిపించింది.
ఏదన్నా పనికొచ్చే పోస్ట్ వెయ్యచ్చు కదా ఈ కోతి వేషాలెందుకు అంటే మలక్ రాసిన హైకూ రామాయణం ముందుమాటలో "నా రాముడితో పరాచికాలాడతానా?" అన్న డైలాగు ఎక్కడో మనసులో సున్నితమయిన చోట తాకింది నాకు. అప్పుడు నాకు భక్తాంజనేయుడే కనిపించాడు మలక్ లో.